Tit 1 | GAM | STEP | Na Pol, na God nu kogoye una moro, na Jisas Krais aposelye moro. God unakye dje i kambono ge, God na dje wori, ga pillgine amblo dongall ye auno dje, kandja kaima pai ge, ga pille kane ye, God nomane paro mal karkar yene dje na dje wori pill.

Titus 1

1 Na Pol, na God nu kogoye una moro, na Jisas Krais aposelye moro. God unakye dje i kambono ge, God na dje wori, ga pillgine amblo dongall ye auno dje, kandja kaima pai ge, ga pille kane ye, God nomane paro mal karkar yene dje na dje wori pill. 2 Na embe yendo ge, God una gun moye we dji ge, ga pillgi dje kui ye moye. God kamasa, wal ta beke nayei kune ge, une embe dji, na ye wornaka ye na boll gun molo pane we dji. Kandja dji ge, God kandja kende dji una namoro. 3 Are, God nono i yem djindo una, yene dji poke, une na dje worika na yene kandjiye dje pene worillka una pi. 4 Taitus, nono pillgine taimane paro pille, ni na warna kaima moren, na pepa bolo ni aundo. God nono Nane ne, Krais Jisas nono i yem wori iwa ge, soka ni wandill golo aumbellka, ni ellin tukin arngan yenda mopen.

Taitus una wopake dje i wordaka pillgi pai una kantau yene.

5 No soka nupoge Krit molo kogo ye pora nadjipill, tuge pa moika na ni kogo ge yemben dje pille kere er pill. Na asamoll ni dje awo kerill, ni dumo taimantaiman dje yero al ge po pillgi pai mor una pende dje imbenka, ga ye molo kantau yene. 6 Ni kantau yene una dje i kogo al worben ge, ga iwana nalene al ibne napanda, gamane taimane moya. Wombane pillgine panda moye, kond aulaul nawanne. Nane mane kandja djine ge, to naworne. 7 Ni kanden, kantau yenj una ge, God kogoye kantau yenj pille, una nalene al ga wambo napanda moye. Na iwa pla moro dje napiye. Kumbene mul ola dje pla wonda. Nu no dall nayene. Una natane una moye. Ku i nambon dje pille we nayene, man. 8 Una ga numbine al wone ge, kantau wopake yene. Wal wopake ta paro ge kane wopake yeneke, nomane wopake pandaka, yenekne kantau wopake ye, kond du dje wane, God wopake moro mal embe moye. 9 Una kandja kaima dje kambono awi ge, ga amblo gi dje moye. Embe yene ge, kandja pai mal dje una beke auneke aglo gi djine. Alla, una kandja to wori dal, ga ye molo nomane amblo du dje aune.

Una dumo Krit moi al ge una wo ga pillgine ye ke ye awi

10 Ni una dje i kogo al worben ge me embe paro. Dumo Krit yei al ge, una merke kandja to worinj, kandja kende dje, kandja me napai yene pir mal djinj. Pakna mor al ge Juda una merke yembe ye, nono gaklene kelip tambon we djinj. 11 Kambono ku i nambon dje pille we ye, singare nayene mal dje una beke awo, una gamane wombane boll mor ge, pillgine ye ke ye awinj. Ge pille, ni man dje aumbenka ga kandja ge alla nadjine. 12 Kamasa dumo Krit una yenekne makimbne al iwa propet ta moi. Une ge kandja embe dji, nono Krit una kandja kende eri djinmon. Una ke kaima molo, kog kena kunda yenj mal embe molo, wal kwa mokna pul no, kollumb wane, kogo yembon dje napirmon we dji. 13 Une kandja embe dji ge kandja kaima dji. Ge pille, singare yenj ge ni man dje awo, amblo du dje aumbenka, ga God boll pillgi kaima djine. 14 Juda una kandjambe kiwa to waninj mal ge, ga napiye. Alla una kandja kaima to worinj una yenekne kandja kindine dje una awinj ge kambono napiye.

15 God nale al ale naparo una mor ge, wal porapora wopake paro dje kaninj. Ba una singare ke ye, Krais Jisas boll pillgi napai mor ge, wal porapora wopake naparo. Ga nomane pakna ke yei pora dji, wal ke wopake paro ge kane kull woro kaninj. 16 No God kane kune yenmon we djinj ba djillakne al djinj. Ga singare yenj ge God mop awo kerinj dje kanmon. Una ge kandja napille, ke mal mor, wal wopake ta yembon dje yene ge kune kaima nayenda.